«Микро, чакан жана орто ишканаларды шашылыш колдоо» долбоорунун алкагында Финансы министрлиги тарабынан ишкерлерге 8 миллиард 874 миллион сомдон ашык суммада пайызсыз насыялар берилди.  Кыргыз Республикасынын Министрлер Кабинетинин Кризиске каршы иш-чаралар планын ишке ашыруунун алкагында жана кризистик кырдаалга жооп кайтарууда чакан жана орто ишканаларга колдоо көрсөтүү максатында 2021-жылдын 31-мартында Кыргыз Республикасында Дүйнөлүк банк жана Азия инфраструктуралык инвестициялык банкы тарабынан каржыланган «Кыргыз Республикасынын жеке жана финансы секторун шашылыш колдоо» долбоору ишке киришкен. 2022-жылдын сентябрь айынан баштап ишкерлер пайысыз насыя ала башташкан.

            Натыйжада, ишке кирген күндөн бүгүнкү күнгө чейин тагыраагы 2025-жылдын 1-апрелине карата пайысыз насыялардын суммасы 8 млрд 874 млн 524 миң 18 сомду түздү.   Аны 11 миң 501 ишкер алган.

            1-категория боюнча (1 млн сомго чейин) 9 миң 548 ишкерге 5 млрд 661 млн 275 миң 918 сом берилген.  

            2-категория боюнча (3 млн сомго чейин) 1 миң 953 ишкер насыя алган.

            Жалпы сумма 3 млрд 213 млн 248 миң 100 сомду түзгөн.   

            Долбоор Кыргыз Республикасынын бүткүл аймагында 2027-жылдын июлуна чейин ишке ашырылат. Маалымдама: Долбоорго катышуу үчүн зарыл болгон критерийлер: 1-Категория - Кыргыз Республикасынын салык мыйзамдарына ылайык иштеген, жылдык жүгүртүүсү 8 миллион сомдон ашпаган жана 6 айдан кем эмес иштеген жеке ишкерлер. 2-Категория - Кыргыз Республикасынын салык мыйзамдарына ылайык иш жүргүзгөн, жылдык жүгүртүүсү 30 миллион сомдон ашпаган жана 6 айдан кем эмес иштеген жеке ишкерлер жана юридикалык жактар. 

Айыл чарбасы каржыланбайт.

Валютасы: КР сом

Пайызы: 0% (пайызсыз)

Финансылык жардамды пайдалануу мөөнөтү: 36 айга чейин

Жеңилдетилген мезгилди берүү мүмкүнчүлүгү: 3 айга чейин

Каржылык жардамдын суммасы:

1-категория үчүн – 1 000 000 сомго чейин

2-категория үчүн - 3 000 000 сомго чейин Керектүү документтердин тизмеси өнөктөш банктар менен такталышы мүмкүн.